Surja el Fil
أَلَمْ تَرَ كَيْفَ فَعَلَ رَبُّكَ بِأَصْحَٰبِ ٱلْفِيلِ أَلَمْ يَجْعَلْ كَيْدَهُمْ فِى تَضْلِيلٍۢ وَأَرْسَلَ عَلَيْهِمْ طَيْرًا أَبَابِيلَ تَرْمِيهِم بِحِجَارَةٍۢ مِّن سِجِّيلٍۢ فَجَعَلَهُمْ كَعَصْفٍۢ مَّأْكُولٍۭ7
- “Vallë, a nuk ke dëgjuar ti se si bëri Zoti yt me njerëzit e elefantit?
- A nuk ua prishi atyre kurthin,
- duke dërguar kundër atyre tufa zogjsh,
- të cilët i gjuajtën me gurë prej baltës së pjekur?
- Dhe kështu, i bëri si byk i ngrënë.
-“ أَلَمْ تَرَ كَيْفَ فَعَلَ رَبُّكَ بِأَصْحَٰبِ ٱلْفِيلِ– Vallë, a nuk ke parë ti se si bëri Zoti yt me njerëzit e elefantit?”- Allahu me këtë ajet i drejtohet Muhamedit salAllahu alejhi ue selem dhe (sipas një interpretimi edhe) umetit të tij. Këtu Allahu konfirmon se gjithsesi ka ndodhur ngjarja e njerëzve të elefantit, sikur ta shihnim me sytë tanë.
Njerëzit e elefantit kanë qenë banorë të Jemenit. Ata kishin ardhur me ushtri për ta shkatërruar Qaben. Me vete kanë marrë dhe një elefant të madh. Jemeni atëherë ka qenë nën sundimin e mbretit të Abisinisë, i cili ka qenë i krishterë. Përmes banorëve të Jemenit është përpjekur që të shtrojë ndikimin e tij në Gadishullin Arabik e të përhapë krishterimin në të. Arsyeja se pse e ka dërguar ushtrinë e Jemenit që ta shkatërrojë Qaben ka qenë që t’i pengojë e ndalojë njerëzit nga kryerja e haxhit, sepse njerëzit vazhdimisht kanë bërë haxhin prej kur e ka ndërtuar atë Ibrahimi alejhisselam. Për t’i penguar njerëzit prej Qabes, ka ndërtuar një shtëpi në Jemen të ngjashme sikurse Qabja dhe ka bërë thirrje që të shkojnë ta kryejnë haxhin e tyre aty, e jo në Meke. Për këtë arabët janë zemëruar shumë. Njëri prej arabëve ka shkuar aty dhe ka kryer nevojën e madhe. Pastaj me të ka lyer dyert e asaj shtëpie. Kur e ka parë këtë gjë mbreti i Jemenit është zemëruar shumë dhe ka lajmëruar mbretin e Abisinisë i cili e ka urdhëruar që të niset me ushtri me një elefant të madh që të shkatërrojë Qaben. Në disa transmetime thuhet se së bashku me këtë elefant kanë qenë edhe gjashtë të tjerë më të vegjël, për ta ndihmuar në shkatërrimin e Qabes. Dhe sipas pretendimeve të tyre, kanë ardhur për ta shkatërruar atë, mirëpo Allahu e ka ruajtur shtëpinë e Tij. Andaj, kur ka arritur kjo ushtri në vendin e quajtur Mugames, është ndalur elefanti, është ulur e nuk ka dashur të ecë përpara drejt Qabes. Sa herë janë munduar ta detyrojnë të ecë drejt saj, elefanti ka refuzuar, e nëse e kanë kthyer në drejtimin e kundër, pra kah Jemeni, ai ka ecur me vrap. Në momentin që e kanë kthyer kah Qabja, ai është ndalur. Këtë e transmeton ibn Kethir. Kjo ka qenë shenjë prej Allahut për t’iu treguar atyre se janë gabim dhe se duhet të ndalen e të mos vazhdojnë tutje. Megjithatë, kanë këmbëngulur që gjithsesi të shkojnë ta shkatërrojnë Qaben. Andaj Allahu u ka dërguar grupe të shumta të zogjve të cilët në sqepat e tyre kanë mbajtur nga një gur prej baltës së pjekur, “A nuk ua prishi atyre kurthin, duke dërguar kundër atyre tufa zogjsh, të cilët i gjuajtën me gurë prej baltës së pjekur?” Dhe secili gur ka goditur nga një ushtar të ushtrisë së banorëve të Jemenit. Siç përshkruhet në transmetime, ky gur ka goditur kokën e personit dhe i ka dal prej poshtë (nga vrima anale).
“ فَجَعَلَهُمْ كَعَصْفٍۢ مَّأْكُولٍۭ– Dhe kështu, i bëri si byk i ngrënë”, si bima që thahet, e pastaj kafshët e përtypin, e ngrënë dhe e shkelin me këmbët e tyre.
Allahu kurthin e tyre e ka kthyer ndaj tyre. Kjo duhet të jetë mësim për çdokënd i cili të vërtetës mundohet t’i shkaktojë të keqe.
Allahu e ruajti Qaben nga shkatërrimi prej elefantit, ndonëse ka ardhur në transmetime se para Kiametit do të vijë një person i cili do ta shkatërrojë Qaben gur me gur, derisa ta rrafshojë të tërën, dhe ai është i Abisinisë. Pse Allahu nuk lejoi që herën e parë ta shkatërrojë Qaben mbreti i Abisinisë, ndërsa para Kiametit do ta lejojë këtë? Kjo për arsye sepse ngjarja e njerëzve të elefantit ka qenë si paralajmërim apo si parapërgatitje për ardhjen e Muhamedit salAllahu alejhi ue selem, se në atë vend do të vijë një njeri i madh, siç dhe ka qenë kjo e paralajmëruar në Librat e mëhershëm. Përmes asaj ngjarje ka dashur të tregojë se Qabja ka pozitë të lartë tek Allahu dhe se Ai e mbron atë. Po në vitin e elefantit ka lindur Muhamedi salAllahu alejhi ue selem.
Para shkatërrimit të Qabes, Allahu do të dërgojë një erë të lehtë dhe ua merr shpirtin të gjithë muslimanëve në tokë. Kur banorët përreth Qabes nuk e respektojnë atë (Qaben), e përdhosin dhe veprojnë mëkate të mëdha aty, atëherë Allahu i ndëshkon në këtë mënyrë dhe lejon që të shkatërrohet ajo. Pastaj nuk zgjatë shumë dhe Allahu e bën Kiametin.
Hoxhë Lulzim Perçuku – Transkriptim – Derset e tefsirit.
