- Shtimi i leximit të Kuranit, shtimi i dhikrit, lutjeve tek Allahu, shtimi i faljes së namazave nafile dhe i dhënies lëmoshë
Sa i përket lutjes Pejgamberi salAllahu alejhi ue selem ka thënë: “Tre personave Allahu nuk ua refuzon lutjen: agjëruesit derisa të bëjë iftar,[1] udhëheqësit të drejtë[2] dhe atij të cilit i është bërë padrejtësi, madje lutjen e tij (atij që i është bërë padrejtësi) e ngritë përmbi re dhe i hapen dyert e qiellit dhe Zoti thotë: “Pasha Madhërinë Time, Unë do të të ndihmoj ty qoftë dhe pas një kohe!”[3] Tirmidhiu dhe imam Ahmedi. Ibn Abbasi radijAllahu anhu ka thënë: “I Dërguari i Allahut ka qenë njeriu më bujar (ndihmues e dorëdhënës). Mirëpo, kulmin e bujarisë së tij e ka arritur në muajin Ramazan, pasi e ka takuar Xhibrilin për t’ia mësuar (e përsëritur) Kuranin.” Buhariu dhe Muslimi. Pas kësaj, ai ka qenë edhe më bujar sesa para Ramazanit.
Kur themi se ai ka qenë njeriu më bujar këtu përfshihet çdo bujari e dhënie, dhe ne duhet të mundohemi ta pasojmë atë salAllahu alejhi ue selem. Bujaria e tij mbledh të gjitha llojet e bujarisë: dhënia dije, ndihmë fizike, dhënie e pasurisë (lëmoshë, ushqim ndaj të varfërve) etj. Të gjitha këto i bën për ta ngritur lartë fenë e Allahut. Kështu ka vepruar Pejgamberi salAllahu alejhi ue selem, duke i bërë këto me qëllimin që të ngritët lart feja e Allahut, që të udhëzohen njerëzit dhe që t’u afrojë dobi me çdo rrugë e mënyrë. Të tillë duhet të jemi edhe ne. Ashtu siç bujaria e mirësia e tij salAllahu alejhi ue selem është shumëfishuar në muajin Ramazan, për shkak të pozitës së lartë të këtij muaji tek Allahu dhe se në të shumëfishohen shpërblimet, po të tillë duhet të jemi edhe ne duke u dalluar nga muajt e tjerë në të qenit bujarë, ndihmues e dobiprurës ndaj të tjerëve në mënyrë që ata të kryejnë adhurimet ndaj Allahut në mënyrën më të lehtë.
Njeriu është mirë që të bëjë bashkë mes agjërimit dhe dhënies ushqim ndaj të varfërve, sepse këto janë shkaqe të hyrjes në xhenet. Tregon Ebu Hurejra radijAllahu anhu se një ditë Pejgamberi salAllahu alejhi ue selem ka thënë (kjo jashtë Ramazanit): “Kush prej jush është zgjuar duke qenë agjërueshëm?” Ebu Bekri ka thënë: “Unë.” –“Kush prej jush ka përcjellë sot një xhenaze derisa është varrosur?” Ebu Bekri ka thënë: “Unë.” –“Kush prej jush sot e ka ushqyer një të varfër?” Ebu Bekri ka thënë: “Unë.” –“Kush prej jush sot ka vizituar një të sëmurë?” Ebu Bekri ka thënë: “Unë.” Ka thënë Pejgamberi salAllahu alejhi ue selem: “Kur këto bëhen bashkë te dikush, ai veçse do të hyjë në xhenet.” Muslimi.
[1] Gjatë ditës së adhurimit, kurdo që bën lutje, Allahu nuk ia refuzon atë.
[2] Këtu hyn çdokush që ka përgjegjësi, si: udhëheqësi i shtetit, i familjes etj.
[3] Gjithsesi do ta ndihmojë, qoftë dhe pas një kohe, Allahu betohet se do ta ndihmojë, do t’i pranojë lutjen dhe do të bëjë që ai të ngadhënjejë.
- Agjëruesi ta ndiejë dhuntinë e mirësinë që ia ka dhënë Allahu me mundësimin e agjërimit
Allahu i ka dhënë sukses dhe ia ka lehtësuar agjërimin, ia ka mundësuar të përfundojë ditën e agjërimit dhe po ashtu agjërimin e muajit të Ramazani, e që shumë prej njerëzve janë privuar nga kjo mirësi. Ata ose kanë vdekur para se të hyjë muaji Ramazan, ose janë të paaftë për agjërim për arsye të ndryshme, e disa për shkak të devijimit, humbjes apo mosbesimit në të cilin janë nuk agjërojnë, ia kthejnë shpinën këtij urdhri të Allahut dhe kësaj mirësie prej Tij (agjërimit të Ramazanit). Andaj, agjëruesi duhet të jetë falënderues ndaj Allahut, që e ka udhëzuar e inspiruar dhe që ia ka mundësuar të agjërojë këtë muaj, agjërim ky i cili bëhet shkak për faljen e gjynaheve të tij, për arritjen e Mëshirës së Allahut, për ngritjen e shkallëve në xhenet, e cila është shtëpia e kënaqësisë (darun-neim), duke qenë afër Allahut, Zotit Fisnik. Andaj, ne duhet t’iu përmbahemi sa më shumë rregullave të agjërimit, që të largohemi prej shkaqeve të cilat tërheqin zemërimin e dënimin e Allahut. Duhet të pajisemi me moralet e cilësitë e muslimanëve të parë (selefëve), sepse siç e dimë nuk ka mundësi të përmirësohet fundi i këtij umeti veçse me atë që është përmirësuar fillimi i tij. Nëse nuk i ndjekim dhe imitojmë ata në të gjitha adhurimet e rrugët që kanë ndjekur, atëherë nuk ka mundësi të përmirësohemi, gjithmonë do të dështojmë. Vetëm atëherë kur ne e adhurojmë Allahun siç e kanë adhuruar ata dhe u largohemi mëkateve ashtu siç u janë larguar ata, do të përmirësohet gjendja jonë.
•┈ ┈• • ✦ • •┈ ┈•
Ndejat e Ramazanit – Hoxhë Lulzim Perçuku.
