Rëndësia e mësimit të akides
- Mësimi i akides së saktë është nga obligimet më madhështore dhe është gjëja e parë e cila kërkohet nga njeriu. Ajo është më e rëndësishme sesa të gjitha dijet dhe shkencat e tjera të fesë. Prioriteti i parë në fenë e Allahut është mësimi i akides. Ajo është gjëja e parë mbi të cilën bazohet thirrja (daveti).
- Akidja është dija më e ndershme, më madhështore dhe më e larta.
- Kur mësojmë akiden pastrojmë nijetet e qëllimet.
- Kur mësojmë akiden dhe ua mësojmë të tjerëve, pasojmë rrugën e Pejgamberëve të cilët fillonin thirrjet e tyre me mësimin e akides para mësimit të obligimeve dhe adhurimeve.
- Kur mësojmë akiden, mendja jonë lirohet prej konfuzionit kaotik që buron nga mungesa e akides në zemër. Nëse zemra është bosh nga akidja, ose nuk ka asnjë besim (adhuron materien) ose ka besime të kota.
- Akidja mbron besimtarin nga dyshimet.
- Përmes akides gjendet rehatia shpirtërore dhe mendore.
- Përmes akides bashkohen rreshtat e muslimanëve dhe thirrësve në Islam. Pa të, do të ndahen e përçahen.
- Akidja na bën të respektojmë dhe madhërojmë tekstet e Kuranit dhe sunetit dhe të mos i refuzojmë apo komentojmë sipas dëshirave.
- Akidja e lidh muslimanin me sahabët, tabiinët dhe gjeneratat e tjera që i kanë pasuar.
- Akidja e saktë dallohet shumë qartë nga akidet e tjera, sepse pikënisja e saj është Kurani dhe suneti, dhe ajo qëndron larg çdo keqinterpretimi, refuzimi, përngjasimi e shëmbëllimi.
- Përmes akides përmirësojmë besimin tonë.
- Akidja e saktë e mbron njeriun prej shirkut.
- Përmes akides së saktë realizohet siguria e stabiliteti dhe lumturia e gëzimi, në të dy botët.
- Akidja e saktë është e vetmja ajo e cila mundëson realizimin e mirëqenies në këtë botë.
- Akidja është shkaku kryesor që muslimanët të arrijnë të jenë të parët në sipërfaqen e tokës – të arrijnë lavdinë dhe pushtetin.
- Kur akidja e saktë është kalitur në zemrën e besimtarit, atëherë prej saj do të burojnë vepra të mira.
- Akidja e saktë ia shton besimtarit frikërespektin ndaj Allahut dhe do të ruhet nga mëkatet.
- Përmes mësimit të akides largohet injoranca prej nesh dhe na bëhet e qartë se nuk mjafton besimi nëse akidja nuk është e saktë.
Njeriu i cili beson tek Allahu dhe vepron sipas fesë, ai patjetër do të ketë lumturi e stabilitet dhe do t’i lehtësohen çështjet, edhe nëse nuk i posedon gjërat elementare të jetës. Ndërsa, ai që mohon Zotin e tij, tregohet arrogant dhe nuk i nënshtrohet, do të ketë jetë të mjerë dhe tek ai do të grumbullohen të gjitha shqetësimet, brengat, ankthet për të ardhmen, edhe nëse posedon të gjitha mjetet e rehatisë dhe mirëqenies.
Kur zbehet dhe humbet akidja në mesin e njerëzve, do të shtohet egoizmi dhe secilit do t’i interesojë interesi i vet.
Hoxhë Lulzim Perçuku
🪶 Transkriptim
